الاثنين، 27 يوليو، 2009

صرصار لكل مواطن


يمكن عنوان غريب شوية بس هنفهم كل حاجة دلوقتى . أنا هحكى عن يوم مر عليا فى الصيدلية وانا بعتبرة من أجمل ألايام إللى مرت عليا وأستفدت منها حاجات كتير قوى على الجانب الشخصى قبل الجانب المهنى قد اتحدث عنها فيما بعد ولكننا لسنا بصددها اليوم .نرجع تانى لموضعنا نزلت الصيدلية الصبح كعادتى زى أى يوم عادى جدا وبدات التمرين وهو عبارة عن إنى بنزل الادوية وأكتبها واكتب المادة الفعالة وأستخدامة والتركيز واشياء من هذا القبيل . ويقطع هذا العمل ان تاتى روشتة فيطلب منى الدكتور قراءتها وأحاول صرفها بس الحمد الله دلوقتى بقدر أصرف روشتات ولو أن الدكاترة بيكتبوا برجلهم مش بإيدهم ومش إنجيليزى لا هيروغليفى ومن المواقف الطريفة التى حدثت هذا اليوم واعطتة تميزا عن باقى الايام هو دخول الحاج سيد وما ادراك ما الحاج سيد فهو رجل لم أرى مثلة قط واعتقد انى لن أرى مثلة فهو غريب الاطوار بجد وقد يحتاج إلى بوست كامل .وايضا دخول مدام تسأل عن طبيب جلدية يدعى د_ عصام الحضرى اة والله بجد وممصمة انو اسمةعصام الحضرى والدكتور يحاول إقناعها ان عصام الحضرى دا لاعب فى النادى الاهلى وهى مصممة على رايها بطريقة مستفزة جداجداجدا .وفى هذة اللحظة لم أتمالك نفسى من الضحك . المهم نرجع تانى قطع هذا الحديث هو دخول الدكتور بفطائر سخنة من الفرن المجاور للصيدلية ولازم ولابد انى أكل أى نعم هى كانت سخنة وريحتها حلوة جداجدا بس لازم أعمل فيها مكسوفة ومش قادرة ولسة فاطرة والحاجات دى . المهم أصر أنى أكل وقد تم بالفعل وأكلت من الفطائر وأكل هو كذلك وقد تبقى فى الكيس فطيرة وفجأة وبدون مقدمات خرج الدكتور مسرعا ومعاة كيس القطائر أستغربت من الموقف ولكنى أكملت التدريب وأكملت كتابة الادوية ومرت نصف ساعة ثقيلة جدا فى الصيدلية فالدكتور متوتر جدا جدا وهذا ليس من طبيعتة وأستغرق فى تفكير عميق أنا قولت حصلت كارثة ولا اجرأ على سؤالة وبعد هذة النصف ساعة خرج من الصيدلية وغاب لمدة عشر دقائق ورجع مبتسما فلاحظ على علامات الاندهاش وقالى الطامة الكبرى قالى انتى عارفة يا دكتورة كان فى أية فى الكيس قولتلة فطير يا دكتور وكان طعمة حلو قوى وجزاكم الله خيرا قالى كان فطير ومعاة صرصار يا دكتورة لم أستطع أن أتمالك نفسى وقلت أكيد حضرتك بتهزر مش كدا قالى والله كان فى صرصار فى الكيس . قلت إزاى دا فرن يعنى لازم يبقى نضيف ضحك وقالى انتى فى مصر مش كندا .

إللى زود إستغرابى هو توترة لمدة نصف ساعة وكاد الفضول يقتلنى إلى ان سألتة وقالى ان أول مرة خرج من الصيدلية راح لصاحب الفرن وخلاه يشوف الصرصار ولم يتكلم معاة فى أى شىء ورجع الصيدلية لانة كان عصبى جدا ولو كان أتكلم معاة كان اتعصب علية ولكنة فضل انو يرجع ويفكر كويس إزاى يروح يكلمة بدون عصبية ويفهمة انو بيتعامل فى أكل يعنى صحة الناس ودى حاجة مفيهاش تهاون ومينفعش حد يستهتر بيها إلى هذا الحد. والحمد الله تم تناول المطهرات المعوية تحسبا لوقوع أى أضرار .بس أكتر حاجة طلعت بيها من الموقف دا انهاردة هو أن الانفعال اللحظى فى الموقف غير فعال بل بالعكس ممكن يضر أكتر ما يفيد وأنى لازم أفكر كويس قوى قبل أى حاجة حتى لو كان موقف صغير زى دا . يعنى دكتور أحمد بالموقف دا قدر يأخد حقة من صاحب الفرن .وصاحب الفرن فهم غلطة ووصل فكرة فى نفس الوقت ومخسرش صاحب الفرن . بس كدا ومر باقى اليوم بإمان وسلام . ومن هنا رفعنا شعار صرصار لكل مواطن

هناك 20 تعليقًا:

صوت من مصر يقول...

ممكن برص لكل مواطن

ابو صهيب ( الجمعاوي الاصيل)سابقاً يقول...

تعيشي وتخدي غيرها يادكتورة

عموماً دهالطبيعي في مصر

اناعارف فرن عيش بلدي

كاتب على الفرن ايه

جمع الصرصار تاخد طاولة عيش مجاناً

عادي يعني

وبعدين انتي ضحكتي علي فين حلاوة النجاح يابله

(Joudy) يقول...

معلش يا دكتورة كلنا لها بس بجد الدكتور ده ماشاء الله قدر يكظم غيظة ربنا يجعلنا من الكاظمين الغيظ والعافين عن الناس أمين يارب العالمين

دمتى بكل الخير والسعادة

الشاعر الحزين يقول...

أكتر حقيقه قالهالك الدكتور هى

ان احنا فى مصر مش فى كندا

يعنى لازم نعيش على الوضع ده

لكن عجبنى قوى تصرف الدكتور

لكن عندى ملاحظه بسيطه قوى أتمنى تقبليها

الموضوع فى كتابتك ليه

فيه جزء بالفصحى وجزء بالعاميه

يعنى لو الموضوع كله بلهجه واحده يكون أفضل

ده طبعا والله مش تطفل أو حاجه

بس لأنى بحب مدونتك جدا أحب دايما انها تكون مميزه

وميكونش فيها غلطه

أتمنى تقبلى كلامى بصدر رحب

دمتى بالخير

مصعب صلاح يقول...

السلام عليكم
دا زي موضوع الراجل اللي كان كل مايشتري رغيف يلاقي فيه جزء من فار فسأل الفران قال له دي مسابقه جمع الفار تكسب العيش

ولا عزاء للشعب

تقبلي مرروي

لمسات يقول...

على فكرة الدكتور غلطان
لانه المفروض كان يحتفظ بهذا الصرصور المصرصر ذكرى او يديهوليك سوفينير

مصعب صلاح يقول...

السلام عليكم
مدونة مش هنسكت أصبحت مفتوحة للأعضاء فقط وتدعوكم للمشاؤكة معنا في ملتقاها وم الاثنين المقبل الموافق 3/8/2009 الساعة العاشرة مساءا بتوقيت القاهرة كميعاد للقائنا عبر الشات لمناقشة أوضاع المدونة وما ستئول إليه المدونة في الفترة المقبلة ومراجعة ما وصلنا إليه منذ إنشاء المدونة
نسعد بحضوركم واهتمامكم عبر الإيميل الخاص بالمدونة : marwa_elsherbiny09@yahoo.com

لمسات يقول...

عايزين لينكات قصة عمر وسارة تانى لو سمحت

yoyeta يقول...

اهو الحكومة مش مخلية نفسنا فى حاجة و هتخلى صرصار لكل مواطن علشان ميكونش لحد حجة
و تصرف الدكتور صح و فيه حكمة و عجبنى جداً
وفعلاً عدم الاهتمام بالنظافة فى المطاعم و الافران و غيرها هو ده اللى خلانى مكلش بره البيت الا للضرورة و قليل جداً
تقبلى مرورى

غير معرف يقول...

ارجوكم يا جماعة ان صعقت بمدونة الكترونية جديدة قبطية
بيسبوا و يشتمو فى الرسول ( صلى الله عليه و سلم ) و فى ربنا ( تعالى الله عما يقولون )
ارجوكم ممكن تدخلوا على المدونة دى و تعلموا المدونة و يا ريت لو قدرتم انكم تنشروا اللينك علشان كل اللى يدخل يعلمها و بكده تتأفل المدونة
و هو ده اللينك http://mem-kaf.blogspot.com/

همسة يقول...

صوت من مصر
ممكن برص وممكن صرصار
كل حاجة ممكنة مادمنا فى مصر أم الدنيا
شكرا لمرورك

همسة يقول...

جودى
فعلا والله تصرف الدكتور أعجبت بية جدا لما كظم غيظة
ربنا يجعلة من الكاظمين الغيظ دائما
نورتينى يا قمر

همسة يقول...

فعلا إللى يعيش يا ما يشوف ولسة ياما هنشوف أكتر من كدا طول مأحنا عايشين فى مصر .
ههههههههه فين الفرن دا وانا أروحلة وأجمع الصرصار صرصار صرصار بس طولة العيش أهم محدش بيلاقى العيش دلوقتى .
شكرا لمرورك

همسة يقول...

الشاعر الحزين
فعلا أهم حاجة أن إحنا عايشين فى مصر مش كندا
ثانيا ربنا يكرمك ان مدونتى عجبت حضرتك ويارب أكون بقدم من خلالها حاجة تفيد الناس .اما بالنسبة للملاحظة أنا قبل ماكتب البوست كنت مترددة أكتبة بالعامية ولا بالفصحى أنا أميل إلى الكتابة بالفصحى ولكن الموضوع هزلى شوية فكان ولابد من دخول العامية بس إن شاء الله أحاول ألا يتكرر مرة أخرى .
شكرا لنقدك المتميز
وجزاكم الله خيرا

همسة يقول...

مصعب صلاح
هو بالضبط كدا يا مصعب
ولا عزاء للشعب
نورتنى

مصطفى أبوزيد يقول...

ههههههههههه
بالفعل يا دكتوره الشعار مهم
صرصار لكل مواطن
المشكله الاكبر ان المواطن ممكن يفضل يسوء به الحال لحد ما يبقى صرصار برضه

الله المستعان
تقبلي تحياتي المتواصله

همسة يقول...

لمسات هو فعلا غلطان
انتى عارفة لية عشان مسبناش باقى الفطير ليكى يلا مالكيش نصيب تكلى من الصرصار المرة الجاية ان شاء الله هعمل حسابك ياهند.
والف مبروك يا ستى لإسامة وعقبالك يا هنودة

همسة يقول...

مصعب صلاح
وعليكم السلام
والله يا مصعب مش عارفة أقولك أية بجد إللى حصل يوم الاتنين دا شىء مؤسف بس الحمد الله إن إحنا وصلنا لحاجة فى الاخر.
ربنا يوفقنا وتطلع المدونة حلوة ان شاء الله

همسة يقول...

yoyeta
فعلا الحكومة مش مخلية حاجة فى نفس الشعب إلا وبتعملها حتى الصراصير
ربنا يعينا
أسعدنى مرورك
تحياتى

همسة يقول...

غير معروف
انا دخلت المدونة وفعلا حاجة مؤسفة جدا بس لو دخلنا وعلقنا وجدلنا معاه يبقى بنعمل للمدون دا قيمة انما احسن حاجة انك تتجاهله خالص .وكفاية بس تعلم على المدونة او تبعت شكوى
وربنا يهدى الجميع