الاثنين، 10 أغسطس، 2009

تـــــــــــــــــاج


التاج دا صعب قوى وأخد منى وقت كبير جدا فى التفكير لأجد الأجابات المناسبة له وأحب أشكر جــــودى إللى أهدتنى التاج دا لانة تطلب مصارحة كبيرة جدا مع النفس وكم كنت أحتاجها بشدة فشكرا لكى جودى.

نبدأ بسم الله

اذكرى عشرة أشياء صادقة فى حياتك ؟

أول شىء صادق فى حياتى ولم اتردد أبدا فى كتابتة وهو إنى بحب والدى جداجداجدا فهو ابويا وأخويا الكبير وهو بمعنى أوسع كل شىء فى حياتى ونفسى بجد أكون أبنة صالحة وبارة بيه وكمان أخواتى بحبهم جدا وبحس انى أمهم مش اختهم الكبيرة



الصداقة شىء صادق ومهم جدا ليا بمعنى أدق الأخوة فى الله حاجة كبيرة قوى عندى وأختى فى الله هى أختى بالضبط بس فى ناس مميزين عندى زى هند وسارة دول مش أصحابى دول أخواتى واحيانا كثيرة بقول لهند انتى أمى مش صحبتى بجد دول حاجة كبيرة قوى عندى وصادقة جدا بعد أهلى هما نصى التانى ووصلنا لدرجة انهم ممكن يفهمونى من غير ما أتكلم . عشان كدا انا بقولهم انى أحبكم فى الله



الحـــــــــــــــــــــــــــــــــــــــــزن هو شىء صادق فى حياتى

من الأشياء الصادقة فى حياتى هى إنى أحقق أحلامى وطموحاتى ودى كتير قوى ممكن أقول حلم منهم هو انى أبنى بيت مسلم بمعنى الكلمة ويشاركنى فية زوج ملتزم ويساعدنى أحقق حلمى فى الوقت دا أكون حققت هدف كبير فى حياتى .



نفســـــــــــــــــى أتم حفظ كتاب الله كاملا فى المدة إللى حددتها لنفسى .فدعواتكم



دعوة ربنا من أكتر الأشياء الصادقة فى حياتى وإللى بحس أن حياتى لها معنى وهدف طول ما ربنا بيستخدمنى فيها ودايما بدعى الدعاء دا " اللهم أستخدمنى ولا تستبدلنى "



حب ربنا من الاشياء الصادقة فى حياتى فأنا طوال مسيرة حياتى وأنا أبحث عنه
ولم أجده إلا مع الله عزوجل أجدة بجانبى وقت الشدة ووقت الفرح عندما أثقل بالهموم أجدة فى كل وقت معى لذلك عندما كتبت فى وصف المدونة قلبى ملك ربى عنيت كل حرف كتبتة فقلبى ملك له وحدة



نفســــــى أعمل عمرة قوى كان من المفروض أنى اسافر فى رمضان ولكن شاء الله أن تحصل ظروف تمنعنى من السفر .فلعله خير



من الاشياء الصادقة فى حياتى هى تفوقى فى مهنتى ونفسى أفتح سلسلة صيدليات زى صيدليات العزبى وخليل وكمان مصنع أدوية بس نصنع المادة الفعالة فى مصر ياااة بجد دا حلمى الكبير وإن شاء الله أحققه .



أخيرا وصلت لآخر نقطة أخر حاجة صادقة فى حياتى هى من أهم وأكترالاشياء الصادقة فى حياتى بس أنا بعتبرها نقطة ضعف فى شخصيتى لذلك فإنا أحتفظ بها لشخص واحد فقط لاغير .

بس كدا كان تاج طويل قوى بس فى نفس الوقت انا مبسوطة انى عرفت أجاوب بصراحة كبيرة قوى مع نفسى واحب أهدى التاج دا إلى كل من يرغب فية بس دا واجب على كل من

منوش

أختكم فى الله

مصطفى أبو زيد

أحمد الصعيدى

أبو صهيب ( الجمعاوى الاصيل )

جوجو

بنجاواتى

د_ ياسر عبد الفتاح

همس الحنين ( أية)

الشاعر الحزين

بنت الماضى

هناك 46 تعليقًا:

الشاعر الحزين يقول...

بسم الله ما شاء الله

اجاباتك بتدل على شخصيتك

التدين أول الميزات وأهمها

بجد اجابات أكتر من ممتازه

ويارب يحققلك حلمك

ويارب تعملى العمره ان شاء الله رمضان الجاى بعد ده

ويارب يبارك فيك ويحفظك دايما

ومتشكر على التاج هو جالى خمس مرات بس انا كنت بماطل لكن يظهر انى بتحاصر من كل ناحيه لكن ان شاء الله هجاوبه فى أسرع وقت

دمتى فى رعاية الله

الشاعر الحزين يقول...

ايه ده ؟؟؟؟


دا أنا طلعت أول تعليق

مبرووووووووووووووك عليا

فين الجائزه بقى ؟؟؟؟؟؟

THE illusionist يقول...

هو انا التانى
طيب كويس
نحتفل
بيب بيب بيب
توت توت توت
زيووووووووووووووووووووووو
انا مش بحب التاجات
سوى انها بتعرفنى شخصيه المدون مش اكتر
بس مبعرفش اعلق عليها
بس اقول كمجمل
حلو وكويس وشطور وامور



ده انا طبعا
ههههههههههههههه
مساء الخييييييييييير

صوت من مصر يقول...

مستنى لما تروحى العمره وترجعى سبحه
ادعى بقى انك تعملى عمره

ضكتور جدا يقول...

السلام عليكم
تحياتي على الاجابات الرائعة
وربنا يحقق ما تتمنيه ...سلسلة صيدليات وعمرة وحفظ كتاب ربنا
تحياتي

ابو صهيب ( الجمعاوي الاصيل)سابقاً يقول...

السلام عليكم ورحمة الله وبركاته

ايه الحلاوة دي عرفتي تجاوبي على كل الاسئلة دي

ان من اصعب ما يواجه الانسان ان يتوغل داخل نفسه ليشخصها ويتعرف عليها

فلو انه صارح نفسه وعرف ما تريد وكان صادقاً مع نفسه لحقق مايريد كله بعون الله وبارادته

حقق الله احلامك ورزقك ما تريدين

ابو صهيب ( الجمعاوي الاصيل)سابقاً يقول...
أزال المؤلف هذا التعليق.
ابو صهيب ( الجمعاوي الاصيل)سابقاً يقول...

وبعدين انتي لسه بتقولي ان التاج ده صعب

لزمتها ايه التدبيسة دي بأه

ولا انتي غاوية تدبيس

مصعب صلاح يقول...

السلام عليكم
اجابات ع التاج جيدة
برغم بعض الامور
بس دي شخصية حضرتك

mohamed ghalia يقول...

ما أروع الصدق فى حياتك
ربنا يكرمك ويسعدك دايما

د. ياسر عمر عبد الفتاح يقول...

فعلاً النوع ده من الأسئلة صعب جداً
بس الإجابة كانت وافية لكافة جوانب السؤال
وكمان كانت من كتاب الوزارة
إن شاء الله الدرجة هتبقي كويسة


هعمل نفسي مش واخد بالي إن إسمي مكتوب في الإهدائات
علشان أنا مبحبش التاجات أصلاً
وبالذات النوع ده من الأسئلة ,,,
حتي مبعرفش أجاوبه

شكراً لأنك اتفكرتيني

blue-wave يقول...

حلوة اجاياتك
تقبلى تحياتى

ريمان ونوسه فى هاكونا مطاطا يقول...

انت لسه هنا؟


لا لا تعالى بسرعه عندنا


تيمون وبوبما عايزينك


كل ما تضحك اكتر كل تاكل بطاطا اكتر

هاكونا مطاطا

مش هتقدر تغمض عنيك

هاكونا مطاطا هديتنا لكل المدونين عشان نخرج من حاله النكد

هاكونا مطاطا تهييس للصبح

هاكونا مطاطا ... لااااا للملل


هاكونا مطاطا... قول لاء للهم

هاكونا مطاطا.... اوعى تزعل ابدااا

هاكونا مطاطا... ارمى الماضى ورا ضهرك


انسى الماضى اللى يغيظ


يلاااااااااا تعالى مستنى ايه

وياريت تضيف اللينك عندك
ومش هتندم ابدآ

مودتى

احمد بدر الدين يقول...

توفى اليوم والد اخى وحبيبى المدون الرقيق الاخ مصعب صلاح تغمدة الله برحمتة واسكنة فسيح جناتة
ادعو له بالرحمة والمغفرة
هذا عنوان مدونة الاخ مصعب
http://wa7y.blogspot.com/

آه من قلبي يقول...

اجاباتك حلوة جدا
وبتدل ان انت شخصيتك حلوة
ربنا يباركلك
وممكن تزوري مدونتي
عشان هي لسة جديدة

جوجو يقول...

السلام عليكم

اخبارك ايه؟

اجباتك جمييييييييلة زيك طبعا

بشكرك على الاهداء بس انا جاوبت التاج ده قبل كده

شكلك نفضتيلى ومش دخلتى عندى فى البوست بتاع التاج

هههههههه ولا يهمك بهزر بهزر

تحياتى

♥ Am fOpa'D ♥ يقول...

تاااج طويل بس قوي
ان شاء اله ربنا يكرمك في مهنتك ورسالتك وتعوضي فرصة العمرة في فرص تاانية ان شاء الله

رمضاان كريم همسة,,,:)

بنجاواتى يقول...

السلام عليكم

انا حظى قليل شوية لانى مكنتش بتابع مدونتك و كنت مفكر انى ضايف مدونتك عندى لكن للاسف طلعت مش عندى

وبقول حظى وحش لانى مش هقدر اتابعها فى الفترة اللى جاية

بجد انا حسيت براحة وسعادة وانا بقرا اجاباتك عن الاشياء الصادقة فى حياتك ويا رب يتم عليكى نعمته وتكملى حفظ القرآن ويسعدك دايما ربنا

تحياتى

كلام في الحب يقول...

السلام عليكم
مدونتك ما شاء الله جميلة
والتاج اسئلتوا واجباتو حلوة وان شاء الله تختمي القران ويا رب انا كمان
ده اولزيارة واتمنة انك تزوريني والمدونة تعجبك

أختكم فى الله يقول...

حبيبتى اولا كل سنة وانتى طيبة

ثانيا اجاباتك بجد بتدل على شخصية جميلة جدا وعسولة

شكرا على تمريرك التاج

همسة يقول...

الشاعر الحزين
ربنا يكرمك يا علاءعلى التعليق الجميل دا
وفعلا انت متحاصر ولازم تجاوبه

همسة يقول...

الشاعر الحزين
كلاكيت تانى مرة
أة فعلا أول تعليق مبروك عليك
تانى تعليق كمان
ألف ألف مبروك كسبت معانا عربية
ولازم تيجى تستلمها
شكرا لمرورك

همسة يقول...

THE illusionist
زناتى
أية الفرح إللى انت عملو ده وعلى فكرا انت تلات تعليق مش التانى .بس مايضرش بردة
مساء النور
نورتنى

همسة يقول...

صوت من مصر
انت أدعى بس وأنا أورح وهيجب السبحة ومصلية وإللى انت عاوزة بس أروح
شكرا لمروك

همسة يقول...

ضكتور جدا
وعليكم السلام ورحمتة الله وبركاتة
اللهم أمين
سعدت بزيارتك

همسة يقول...

أبو صهيب
وعليكم السلام ورحمتة الله وبركاتة
اة والله الحمد الله عرفت أجاوب علية وفعلا أصعب ما يواجه الانسان هو أن يواجه نفسة
اللهم أمين
نورت المدونة

همسة يقول...

ابو صهيب
هو التاج صعب بس الاسئلة كلها من المنهج وأما عن التدبيس فإنت اكتر واحد تعرف مين إللى بيدبس التانى والباب الرابع يشهد .
تحياتى يا خالى العزيز

همسة يقول...

مصعب صلاح
مش عارفة لية مش فاهمة تعليقك
بس نورتنى يا مصعب

همسة يقول...

د_ يا سر
يعنى هجيب درجات حلوة على ضمنتك
شكرا لمرورك وتعليقك
وعلى الرغم من إنك مش بتحب تجاوب على التاج
بس دا واجب ولاز م تجاوبه

همسة يقول...

blue-wave
جزاكم الله خيرا يا دكتور عمرو
شكرا لمرورك

همسة يقول...

ريمان ونوسة فى هكونا مطاطا
حاااااااااااااضر
يا أنوسة

همسة يقول...

أحمد بدر الدين
إنا لله وإنا إلية راجعون
ربنا يرحمه ويغفرله

همسة يقول...

أة من قلبى
شكرا يا قمر دا من ذوقك
ربنا يكرمك
ممكن طبعا فى أقرب وقت هتلاقينى عندك

همسة يقول...

جوجو
الحمد لله والله يا جميل
ربنا يكرمك
ههههههههههههههههههههه
مقدرش يا جوجو انتى عارفة
بس ممكن ىأكون مخدش بالى بس
نورتينى

همسة يقول...

Am fopa'D
فعلا طويل
ربنا يكرمك
اللهم أمين
زيارتك أسعدتنى

همسة يقول...

بنجاواتى
أخجلتم تواضعنا والله يا دكتور بالتعليق الجميل دا
وأنا إللى حظى حلو ان حضرتك علقت عندى
ربنا يكرمك يارب
شكرا لمرورك وتعليقك

همسة يقول...

كلام فى الحب
وعليكم السلام ورحمتة الله وبركاتة
ربنا يكرمك يارب دا من ذوقك
أكيد إن شاء الله أزور مدونتك
نورتينى

همسة يقول...

أختكم فى الله
وانتى طيبة يا سمسمة ربنا يخليكى يارب
دا من زوقك يا قمر
نورتينى

همسة يقول...

محمد غاليا
جزاكم الله خيرا
اللهم أمين
شكرا لمرورك

اعشق فى الليل ضوء القمر يقول...

السلام عليكم ورحمه الله وبركاته
تقبل الله منا ومنك
ووفقنا للصالحات فى رمضان و بعده
وجعل عملنا له خالصا متقبلا
كل سنه و انت طيب

بنت الماضي يقول...

بقالي ربع ساعه مش عارفه اكتب تعليق :(:(
واخيرا عرفت:)
كل سنه وانتي طيبه ورمضان كريم عليكي يارب
انا اتيجت يا جدعااااان
مع انه تاج صعب اوي اوي بس هحاول اجاوب عليه وامري لله :):)

همسة يقول...

أعشق فى الليل ضوء القمر
اللهم امين
وحضرتك طيب
شكرا لمرورك

همسة يقول...

بنت الماضى
ربع ساعة بحلها الحمد الله انك وصلتى أخيرا
وانتى طيبة يا مونة
بس لازم تجاوبى ع التاج يا قمر
نورتينى

أحمد الصعيدي يقول...

السلام عليكم ورحمة الله

كل عام وأنتم بخير

جعلكم الله من عتقاء الشهر الكريم

شكرا علي التاج
بعد رمضان ان شاء الله

3mr wa2el يقول...

ما شاء الله الكلام حلو اوى و فعلا الاشياء الصادقة كتير و ربنا يوفققك و كل سنة و انتى طيبة و ربنا يوفققك و تفتحي اكبر مصنع ادوية عشانمفيش مستحيل

freemoslema يقول...

اولا كل سنة وانتي طيبة
وربنا يتقبل منك ويجعلك من الفائزين في رمضان
مش عايزة اقولك من أجمل الليالي في حياتي اللي قضيناها مع بعض بين المسجد وبيت العيلة في العشر الاواخر في الليالي المباركة دي .
ربنا يوفقك يا لولو وده أول تعليق ليا في مدونتك الرائعة ..لازم تعملي احتفالية علي شرفي بقي ولا ايه؟