الاثنين، 22 يونيو 2009

إن الله لا يغير ما بقوم حتى يغيروا ما بإنفسهم

السلام عليكم ورحمتة الله وبركاتة
بعيدا عن جو الحزن والكأبة بناع البوست إللى فات .انا الحمد الله نزلت أدرب فى الصيدلية وانا واحدة من الناس إللى كنت خلاص كرهت الصيدلة بس الوضع أختلف تمام بعد ما نزلت الصيدلية .وان شاء الله أكتب عن المواقف المضحة والشعب المصرى إللى زى العسل بيتعامل إزاى مع الدكتور الصيدلى بس دا عايز موضوع لوحدة . المهم نرجع تانى لسبب كتابة هذا البوست ألا وهو حوار دار بينى وبين الدكتور إللى بيدربنى لمدة لاتقل عن ساعتين حول الاية الكريمة (إن الله لا يغير ما بقوم حتى يغيروا ما بإنفسهم).
بدأ نقاشنا إنى سألت عن الادوية المقاطعة فى الصيدلية وهل ليها بديل ولا لأ ولاقيت رد غريب قالى ان هو مقتنع تماما بالمقاطعة بس مينفعش يطبق الكلام دا فى الصيدلية لانة محكوم بالروشتة إللى بتيجى من الدكتور فلو مكتوب فيها الدواء وهو مقاطعة مينفعش يقول المريض انا ما بتعملش مع الشركات دى لانها مقاطعة ولا ينفع أطلع بديل بمناسبة البديل أى حد بيدخل الصيدلية قبل ما يطلع الروشتة بيقول للدكتور انا مش عايز بديل وأكن الدكتور دا مش بيفهم حاجة ما علينا رديت علية وقلت بس الناس لو دخلت ولاقيت دكتور محترم زى حضرتك بيقاطع حتى فى الدواء حتوصلهم فكرة وهيحترموا حضرتك أكتر وهيبقى باب دعوة إلى الله كبير .المهم لم يقتنع بوجهة نظرى كليا .جينا للموضوع التانى والاهم ألا وهو الحكومة والبلد الدكتور مقتنع تمام ان الحكومة دى مفيش زيها ولا هيجى زيها طيب يا دكتور إللى 52مليون إللى بيعيشوا تحت خط الفقر .بطالة تعدت 23% و 13 مليون عانس فى مصر 4 مليون مدمن وقضايا الفساد إللى كل دقيقتين أكبر نسبة فشل كلوى وكبدى فى العالم طبعا كل دا وحضرتك تقول ان الحكومة دى مفيش زيها وما خفى كان أعظم رد عليا بالآية الكريمة
(ان الله لايغير ما بقوم حتى يغيروا ما بإنفسهم)
وقالى ان ربنا عمرة ما هيولى حاكم عادل على شعب ظالم . لما نبقى إحنا ناس كويسة أكيد هيجى الحاكم الكويس وقالى يعنى الريس وبطانتة دى جاية منين مش مننا يعنى من الشعب لما إحنا نبقى ناس بتراعى ضميرها وكويسة أكيد هيجى الحاكم العادل الكويس . واستمر الجدال والمناقشة حول هذة الاية طويلا جدا. قلت كدا تبقى سلبية قالى دى قمة الايجابية . ياريت نفتح باب للمناقشة فى التعليقات وكل واحد يقول رأية فى الموضوع دا أية . منتظرة تعليقاتكم

هناك 23 تعليقًا:

ذكرى رحيل قلم يقول...

السلام عليكم
علي كده الناس من 28 سنة كانت مش كويسة عشان الريس ماسك الحكم من هذة الفترة
لا يستس الناس اصبحت في تدني اخلاقي يوم بعد يوم لبعدها عن الله عز وجل بعدها عن الحق عن سنة الرسول صلي الله عليه وسلم
الواحد بيخاف يخرج من البيت في زمن اصبح لا يتعامل الا بلغة الدهب والفلوس
سيبك بقي انت بتكرهي الصيدلة ليه دي مهنة جميلة جدا وفي ناس كتير بتكتسبها دون طب
ويتميزوا فيها
ربنا معاكي
تحياتي

بنجاواتى يقول...

السلام عليكم

انا رأيى مع الدكتور لانه هو محكوم بالروشتة ولو اعطى دواء بديل يبقى خان الامانة مع الاخذ فى الاعتبار ان المقاطعة ليست واجبة فى حالتنا

اما عن الحكومة اتفق معاه اكتر لان الحكومة نتاج الشعب ولو حضرتك تلاحظى تلاقى ان تلات اربع اخطاءنا ليس للحكومة دخل فيها

وتقريبا كل انسان عاطل يقدر يشتغل بس هو اللى بيحب انه يكون عاطل وكل انسان منحط الاخلاق ومقصر فى دينه هو اللى اختار الطريق ده لنفسه وما حدش غصبه عليه والطرق احنا اللى بنضيقها بعربياتنا واحنا اللى بنبوظها بزبالتنا ومطباتنا

والحمد لله لم نصل الى مرحلة منع المصلين من الصلاة فى المساجد او منع القاء الدروس فى المساجد او الغصب على نشر الفاحشة والفجور وكمان الحكومة عمرها ما وزعت على حد طبق وتليفزيون وقالتله اوعى تقوم تصلى

القصد يعنى ان التقصير مننا وكل انسان مننا داخله طاغوت حكومى كبير بس مالقاش الفرصة اللى يطلع فيها الطاغوت ده

تحياتى

بنت الأسلام يقول...

ذكرى رحيل قلم
وعليكم السلام ورحمتة الله ويركاتة
الله ينور عليكى يعنى إحنا من 28 سنة وحشين قوى كدا ومفيش حد فيا يستاهل ان حاكم عادل يحكمة .انا معاكى انو إحنا فينا كمجتمع سلبيات كتيرر بس فينا أكتر ناس بتحب البلد ونفسها تشوفها فى أحسن حال
والله انا مش مبحبش صيدلة بالمعنى .بس مش بحب الوضع إلى صيدلة وصلت لية .وبعدين شئت أم أبيت فهى دى مهنتى ولازم أحبها عشان أقدر أدى فيها وأنفع بيها.
بس دعواتك انتى بس
شكرا لمرورك

Ramy Wasel يقول...

ما هو فعلا حكومه مفيش زيها
حتلاقى زيها فين دى
ولا فى مجاعات افريقيا حتلاقى حكومه زى بتاعتنا

بس مبروك التدريب ونزول الصيدليه

ولسه ياما حتشوفى فى الصيدليات
كان ليا زمال\يلى كده برضه
بس دايما فى البدايه بس

(Joudy) يقول...

والله يا همسه الدكتور معاه ومش معاه حق فى نفس الوقت لأن بصراحة لازم احنا من جوانا لازم نتغير ونشارك مش نتكاسل ونقول هو أنا صوتى لو حدى هيعمل ايه كده مفيش حد هيعمل حاجة والفكرة اللى مسيطرة على الناس فى ان الحكومة دى أحسن من غيرها فإنهم فاكرين ان اللى هيجى هيكون طمعان هو كمان فى نهب خير البلد ماهو شايف السرقة على عينها ...... نيجى لحكاية مقاطعة الأدوية المفروض انها تبتدى من عند الدكتور اللى بيكتب الروشتة لو الأطباء اتفقوا مع الصيادلة هتكون النتيجة مضمونة وفعلا ان ربنا عمره ما هيولى حاكم ظالم على دولة عادلة ولا العكس والله أعلى وأعلم .....

آه سورى نسيت أقولك ألف مبروك على الشغل وربنا يوفقك

تقبلى مرورى

دمتى بكل الحب والخير والسعادة

أحمد الصعيدي يقول...

الأولة أه
والظلم لما أنتشر
صبح الأمان بقشيش
والتانية أه
والندل لما أحتكم
يقدر ولا يعفيش
والتالتة أه
والحر مهما أتحكم
للندل ما يوطيش

السلام عليكم أختي العزيزة
لو لفينا الدنيا كلها مش هنلاقي أطيب من الشعب المصري ولا أحلي من ده وطن ..رغم كل اللي بيحصل فينا

بنت الماضي يقول...

اولا مبروك التدريب انا بقاليك ام سنه اهو في الكليه دي وماتدربتش ساعتين على بعض والله
وبخصوص كلام الدكتور انا متفقه معاه ان الحكومه دي من الشعب لانه فعلا لو كان الشعب دا كويس كان طلع حكومه كويسه ولو فرضا الحكومه دي الجزء الوحش من الشعب الكويس كانو عملو ثوره ولا اعترضو على الوضع وغيرووه بإديهم
وبخصوص البدائل والله في ناس بتفكر تفكير تجاري الناس لو قلتليها دا بديل فيه كل المميزات بتاعت التاني ونفس كل حاجه مبيقتنعوش خاالص

ربنا يعينك في التدريييب

شهر زاد يقول...

راى الدكتور يتلخص فى (اينما تكونوا يولى عليكم )فعلا الشعب المصرى له سلوكيات مخجلة بس مش معنى كده ان نحط خدنا على ايدينا ونغنى ظلموه بايدينا ان احنا نغير لكن الدكتور نفسه اللى شايف ان الشعب المصرى لازم يتغير مش عايز يتغير الدليل انه مش مقتنع بفكرة المقاطعة لان الصيادلة نجحوا لما عملوا اضراب وواجهوا الحكومة واخدوا مطالبهم اللى هما عايزنها لما اتفقوا واصروا على حاجه نفس الوضع لو عملنا كده مع المقاطعة بس نعمل ايه فى الشعب المصرى اللى مش بيعمل حاجه غير الكلام

بنت الأسلام يقول...

بنجاواتى
انا أتفق معك يا دكتور إن الصيدلى محكوم بروشتة وان الخطوة دى لازم تبدأ من عند الدكتور البشرى .أما للبدائل فأعتقد ان من حق الصيدلى يطلع البديل طالما لايضر بصحة المريض وبعدين البدائل دى مجرد إختلاف لشركات مش أكتر .ومش معقول 80 مليون مواطن على مدار 28 سنة وحشين مستحيل .وبعدين يا دكتور إحنا فعلا وصلنا لمرحلة غلق المساجد فى وجة طلبة العلم يعنى لما إمام مسجد يقفل المسجد بعد الصلاة مباشرة لمجرد انو خايف ان حد يلقى ندوة أو يبقى فى درس علم دا يبقى أية يا دكتور الحكومة خايفة على الشعب من الدين . الحكومة وزعت على المواطنين إللى أخطر من الطبق والتلفزيون وزعت ونشرت أفكار الغرب بكل ما فيها وإللى أخترقت عقول شبابنا حضرتك تقدر تقولى لازمتها أية الكتب اليهودية إللى الوزير فاروق حسنى عايز يترجمها .
خلاصة الكلام لو إحنا وحشين قيراط فالحكومة وحشة أربعة وعشرين قيراط وهى السبب فى الحالة إلى وصل ليها الشعب .
شكرا لتعليقك ومرورك

بنت الأسلام يقول...

رامى واصل
والله عندك حق مش هنلاقى زيها ولا حتى فى مجاعات الصومال
الله يبارك فيك
شكرا لمرورك

بنت الأسلام يقول...

(joudy)
انا معاكى ان الدكتور معاة حق إن إحنا لازم نتغير
بس ياترى نقول إحنا نغير الاول 80 مليون عشان نقدر نعيش فى دولة عادلة .طب دول أوروبا هل كل المواطنين كويسين وأخلاقهم حلوة قوى عشان كدا عايشين فى نظام عادل. بل العكس تمام .أما بالنسبة للمقاطعة فأنا أتفق معاكى وياريت يبقى فى تنسيق بين الصيادلة والاطباء فى الموضوع دا.
شكرا لمرورك
نورتينى

بنت الأسلام يقول...

شجر الليمون
الشاعر الجميل
دائما تعليق مميز
طبعا لو لفينا الدنيا كلها مش هنلاقى زى مصر
بس ياريت ترجع مصر مش مصر إلى مبقتش مصر
شكرا لمرورك

MaNoOoSh يقول...

الموضوع بالظبط زي الفرخة جت الاول وللا البيضة

الشعب مليان فساد من جواه
والحكومة مليانة فساد جوة وبره


بس التغيير فى ايد الشعب نفسه
يعني بالعقل كده
الشعب قد ايه والحكومة قد ايه
مين اللي يقدر يثور على الحاكم الظالم ويغيره

ولو اني مبقاش عندى أمل اساسا ان يجي حد كويس

بنت الأسلام يقول...

بنت الماضى
ياااااة يا دكتورةفى سنة3 و لسة ماتدربتيش على كدا انا مستعجلة قوى .بس التدريب فى الصيدلية ممتع جدا
واضح ان فى إجماع على وجهة نظر الدكتور .طب ياريت النص الحلو يعرف يعمل كدا بس المشكلة ان الحكومة مش سايبة النص الحلو دا فى حالة . أما البدائل انا معاكى ان كتير مش بيقتنع بالبديل فالحل هنا فى أيد الدكتور إللى بيكتب الروشتة
شكرا لمرورك
نورتينى

بنت الأسلام يقول...

لمسات
فعلا لخصتى الموضوع يا باشمهندسة لو الشعب المصرى لية سلوكيات مخزية مش معنى كدا نقف نتفرج لازم يبقى عندنا همة عالية و إيجابية عشان نغير الواقع السىء دا.عندك حق والله إحنا مش بنعمل حاجة غير الكلام
شكرا لمرورك

وحي القلم يقول...

السلام عليكم

كلام سليم وكما قال المصطفي " اينما تكونوا يول عليكم "

تقبلي مروري

شهر زاد يقول...

للاسف البلد بقت مليانه امثال الدكتور المحترم واللى هو ما يعرفوش ان رايه ده هو اللى عامل فى البلد كده طبعا مش قصدى هو بالتحديد لكن احنا عاملين زى العمال لما كانوا بيبنوا فى عمارة وبيسلوا نفسهم ويقولوا (هيلا هيلا صلى عالنبى هيلا هيلا صلى عالنبى)وجالهم المهندس وقالهم انتوا بتبنوا فى كنيسة اسكتوا بعد دقيقة مر عليهم لقاهم بيقولوا (هيلا هيلا بص عالحيطة هيلا هيلا بص عالحيطة)بص المهندس عالحيطة مكتوب عليها (صلى عالنبى )
اهو احنا عاملين زى العمال بنتفزلج مفيش حد يقوم يقول لا ولا يعارض كله خايف على لقمة العيش بلاش نقاطع عشان لقمة العيش بلاش نقول لا عشان لقمة العيش بلاش ....بلاش..بلاش...خلاص خلينا قاعديدن زى ما احنا كده

جارة القمر يقول...

لله في خقه شئون


رائع ماطرحتي عزيزتي

فعلا لازم يكون في رقابة على مواضيع الأدوية

وموفقة بالتدريب

مودتي

ابو صهيب ( الجمعاوي الاصيل)سابقاً يقول...

نعم ان الله لايغير ما بقوم حتى يغيروا ما بأنفسهم

ولكن ليس معنى ذلك الركون وعدم البحث عن التغيير

وننتظر ان يأتي الفارس الذي سيغيرنا الى الافضل وسيأتي لنا بمفاتيح النصر

فلينظر كل منا الى نفسه وليبدأ هو لاغيره بالتغيير ولا ينظر الى احد بجواره او خلفه او امامه

انظر الى نفسك وحسب

تحياتي ومبروك التدريب

بنت الأسلام يقول...

لمسات
صدقتى يا باشمهندسة فى كل كلمة قولتيها وفعلا بلدنا مليانة ناس بتفكر نفس التفكير بس ان شاء الله لن ينتهى التدريب إلا وقد أثرت وغيرت بعض وجهات النظر فى راىء الدكتور ودعواتك .
نورتينى يا قمر

بنت الأسلام يقول...

جارة القمر
شكرا لتعليقك
فعلا لازم يبقى فى وقفة فى موضوع الادوية دا
شكرا لمرورك

بنت الأسلام يقول...

ابو صهيب
نعم صدقت فالينظر كل منا إلى نفسة وليبدأ هو لا غيرة
الله يبارك فيك
شكرا لمرورك

زهرة ألاسلام يقول...

ياأحلى وأرق همسة شكرا لهذة المدونة