الاثنين، 19 أكتوبر 2009


يا إللى داخل كلية الصهللة


أبكى وأندم على حالك


بكرا تعيش مع الكوجنو


وتلف بين المعامل




أعزائى زوار مدونتى الحبيبة لا تستغربوا من هذة البداية فهى نتيجة طبيعية لكل طلاب الصيدلة ( المعذبون فى الأرض) . هذة الأبيات جالت بخاطرى فى محاضرة الكوجنو والذى لا يعرف الكوجنو فهى أرخم مادة ممكن تقابلها فى كلية الصيدلة ودى دلع عقاقير بندلعها ونقول كوجنو .فبعد محاولات مستميتة للتركيز فى المحاضرة والفهم باءت هذة المحاولات بالفشل الذريع ما عدا الجزء الذى أخبرتنا به الدكتورة وهو معاد الأمتحان كمان أسبوعين نزل الخبر على رأسى كالصاعقة هو أنا لحقت افهم عشان أمتحن (حسبى الله ونعم الوكيل ) فيما عدا ذلك فقدت الأمل فى هذة المحاضرة وأمسكت بالورقة والقلم وكتبت هذا البوست وهذة الأبيات المبعثرة التى بدأت بها البوست تعبيرا عما يدور بداخلى ولا أجد منفث أخر أعبر به عما بداخلى سوى هذة المدونة المسكينة وانتم أعزائى زوار هذة االمدونة فلكم الله .فبعد أسبوعين قاسيين من بدا الدراسة ومواعيد مش متظبتة والجدول بايظ ولف ع المعامل هات الجدول وأطلع الدور السادس وروح المبنى القديم ولأ السكشن أتغير الدور الثامن المبنى الجديد . لحد ما الواحد حس انو خلاص استهلك فى هذا الأسبوعين وبردة مش عارفة أمسك فى أيدى جدولى .فعملت إعلان فى الكلية بين أصدقائى وقولت إللى هيجمعلى كدا جدول سكشن 2 هديلوا واحد كابتشينوا .والحمد الله الكابتشينوا عمل شغل والجدول الحمد الله وصل . ومن أمنياتى فى هذة الكلية انى أقعد مرة واحدة فى البنش الأول مش عارفة إللى بيقعدوا فى الأول بيبقوا نايمين فى الكلية ولا بيصلوا الفجر هناك بس الحمد الله بلحق سلم المدرج أقعد علية ويوم ما يبقى ربنا كرمنى وفى حد حاجزلى ألاقى صوت يخترق الصفوف وينادى ويقول يا جبالى تعالى انا حجزتلك(جبالى دا أسمى الحركى فى الكلية وكان دايما أستاذ سعيد الصاوى بينادينى بيه ) أقول الحمد الله ربنا كريم أبص ألاقى زمايلى حاجزين البنش الأخير ويقولو أحمدى ربنا . الحمد الله على كل شىء .ربنا يعدى السنة دى على خير .واطلع من الكلية دى بعقلى وسليمة .وبدون أى إصابات


أسيبكوا بقى عشان مفروض عندى إمتحان بكرا وربنا المستعان بس انا كنت محتاجة أصدع دماغكم بشوية الكلام دول وأطلع هذا المخزون عشان أعرف أذاكر .


نيجى لأخر حاجة وهى لكل محبى المنشد حمزة نمرة المنشد الأسلامى إن شاء الله هيبقى فى حفلة فى مكتبة أسكندرية 10/30هتبقى يوم جمعة الساعة 8 مساءا بالقاعة الكبرى . وحجز التذاكر فى المكتبة والتذكرة ب 25 جنية . وإللى مش هيجى الحفلة ان شاء الله هيبقى فى بوست هنزله بعد الحفلة فى كل إللى حصل وكمان فيديو يعنى أكنكوا رحتوا بالظبط .


هناك 28 تعليقًا:

(Joudy) يقول...

ياعينى كل دى بهدلة وكمان دور ثامن لا ده انتوا معذبين بجد ..... أنا كان أخرى الدور الخامس وعمرى ما طلعته إلا كام مرة يتعدوا على الصوابع ربنا يكون فى عونك وتخرجى منها بالسلامة وربنا معاكى فى الامتحان وابقى طمنينا

دمتى بكل الخير والسعادة

ابو صهيب ( الجمعاوي الاصيل)سابقاً يقول...

يلا حصل خير ان شاء الله

امتحان سعيد ان شاء الله

ومن طلب العلا سهر الليالي

واللي يقعد على الشلتة ينجح فلته

؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

سمعت ان احنا معزومين على الحفلة

Ahmed يقول...

اووووووووووووووووه
على طول كده

اهو ده عيبه

من اول يوم يقولك عندنا امتحان

ده مزاج عندهم
يركبولك الدنيا ويقلولك اتصرفي

بحس كتير انهم فعلا بعدم نظامهم بيتعمدوا يقرفوا الطلبه ويكرهوهم في عيشتهم

وحي القلم يقول...

السلام عليكم
الحمد لله أنا أدبي
ربنا معاكم

Unknown يقول...

ياحبيبتى يااختى
الله يعينك فكرتينى
بالذى مضى وكان
وحاسة ومصدقة كل كلمة
كتبتيها بس على العموم
نحن السابقون وانتم اللاحقون
كنت طب عين شمس وبنزل الساعة
6الا ربع اوصل سبعة الا خمسة
استنى البيه الفراش لما يفتح
المدرج ...........هجوووووم
اقعد فى اول بنش والا عليه
العوض ومش حأفهم ولا كلمة

الزنارى يقول...

بعدما بدأت أدون عن حكايتى مع الثانوية العامة فى مدونتى ظننت أن المصاعب التى تعرضت لها قد تكون خاصة بى و فقط لكن يبدو أنها عامة و ليس فى الثانوية و فقط بل وصلت حتى للجامعات
أشكرك

Unknown يقول...

بنت خالي العزيزة المحبوبة
ربنا معاكي ..اشد علي ايديكي واقولك اتحملي واصبري واجتهدي عشان تحققي احلامك ..
وما نيل المطالب بالتمني ولكن تأخذ الدنيا غلابا
واللي اعرفه عنك انك قدها وقدود.
اشوفك في الحفلة يا جميل

زهرة(جنى)الاسلام يقول...

السلام عليكم
اللة معكى يابنت الاسلام وأمحان موفق بعون الله

بنت الأسلام يقول...

جودى
منورانى والله يا قمر شفتى البهدلة إللى انا فيها أدعيلى بقا أخلص بسرعة .الدور الخامس لا داأنتو مدلعين على الأخر .
نورتينى

بنت الأسلام يقول...

أبو صهيب
خالى العزيز منورنى والله
طبعا أنت عارف رأيى فى موضوع الأمتحانات (نم وأرتاح يإتيك النجاح)
بس إللى يقعد على الشلتة ينجح فلتة دى جديدة أول مرة أسمعاها.
أما الحفلة ياااه دا أنت تنور الحفلة بس أنا معزمتش حد ولا هو نظام تدبيس .

بنت الأسلام يقول...

أحمد أبو العلا
صدقت فى كل كلمة
هما مزاج عندهم انهم يقرفوا الطلبة
بس هنعمل أية بقا ربنا يتولانا
شكرا لمروك

بنت الأسلام يقول...

مصعب صلاح
ربنا رحمك والله يا مصعب
اللهم أمين
شكرا لمرورك

بنت الأسلام يقول...

norahaty
أخيرا لقيت حد حاسس بالمعاناة إلى انا فيها طيب أنا بنزل 6وأوصل 8 مع أن المسافة مش تأخد كل دا بس الأتوبيس الأخضر بيأخد سنة عقبال ما يوصل ومحدش يسأل الأتوبيس ألأخضر دا أية .وعند باب المدرج مش بيبقى هجووووووووم دا الحرب العالمية التالتة وبردة مش بلحق مكان لانى مش بعرف أدخل فى الزحمة دى بستنى لما الباب يفضى خالص وأبقى أدخل .وبلحق سلم المدرج بقعد علية يلا ربنا يعدها ع خير
نورتينى

بنت الأسلام يقول...

الزنارى
لا ثانوى أية دا الجنة ونعيمها فى الثانوى .طيب ياريت أرجع ثانوى تانى
بس على العموم ربنا يوفقك
شكرا لمرورك

بنت الأسلام يقول...

freemoslema
بنت عمتى العزيزة منورانى والله
جزاكم الله خيرا على التعليق الجميل دا
بس جبتى منين قدها وقدود دى .
هانت كلها أربع أيام ومتجبيش سيرة الحفلة تانى مين قال أن إحنا رايحين يا بنتى الحيطان ليها ودان.
نورتينى يا قمر

بنت الأسلام يقول...

زهرة الأسلام
يا دى النور يادى النور زهرة الأسلام بنفسها بتعلق هنا.ربنا يكرمك يارب بس متنسينيش من دعواتك .وخلينا نشوفك قريب

كريم مصطفي سيد يقول...

السلام عليكم
ربنا يعينك وييسرلك الحال وتوكلي علي الله

عالم حبيب يقول...

ربنا يوفقك وتعدي على خير ان شاء الله

أحمد الصعيدي يقول...

أعانك الله علي كل الصعاب

السلام عليكم

د. ياسر عمر عبد الفتاح يقول...

شوفي مش هقول غير حاجة واحدة
ربنا معاكي
أنا سقطت في العقاقير أربع مرات
بتسموها كونجو
كنت مسميها مادة العراقيل

أمال لما تدرسي السقوطيكال هتعملي إيه؟
دلع السيوتيكال يعني

قرأتي المقامة الصيدلية بتاعتي؟
هتلاقي فيها قصة حياتي في الكلية دي
اعملي سيرش عليها وإنتي تلاقيها

بنت الأسلام يقول...

كريم مصطفى السيد

وعليكم السلام

اللهم أمين

شكرا لمرورك

بنت الأسلام يقول...

عالم حبيب

اللهم أمين

شكرا لمرورك

بنت الأسلام يقول...

أحمد الصعيدى

نورت المدونة يا فندم

اللهم أمين

بنت الأسلام يقول...

د_ ياسر عمر عبد الفتاح

أربع مرات مرة واحدة ربنا يطمنك
أنا أصلا كان ليا حكايات مع النبات فى إعدادى وواضح أنها هتكرر مع الكوجنو .بس عندك حق هى فعلا عراقيل إحنا فى عالم والدكاترةفى عالم سمسم أصلا الدكتور يسألنا فاهمين نقول لأ يكمل شرح عادى ولا كأن حاجة حصلت .أما سيوتيكال فحدث ولا حرج كل إلى أعرفه عنها أن 3 دكاترة بيدونا أكتر من كدا مش أفيدك .بس بنام كويس فى محاضرات السيوتيكال .
طبعا قرأتها وجميلة جدا ماشاء الله على حضرتك أنا بقول سيبك من الصيدلة وألف مقامات أفيد بكتيررررررررررررر
وأظن حضرتك دخلت سوق العمل وأكيد حبيت المهنة أكتر وأكتر مش كدا ؟؟؟؟
تحياتى
وأتمنالك التوفيق

خواطر شاب يقول...

والله النظام ده حقا يقوم بقتا تدريجي للطالب
انا في كلية الطب كل اسبوع الجدول يتغير
مواعيد الامتحان تتغير
كل ده وانا لسه في سنة اولي
ربنا المستعان وتعنيا يارب
تقبلي مروري
اعانك الله في الامتحانات
والسلام عليكم ورحمة الله بركاته

رابطة هويتي اسلامية يقول...

السلام عليكم ورحمة الله وبركاته


شاركونا الإحتفال بمرور عام على تأسيس رابطة هويتى إسلامية

كما يسعدنا أن نقدم لكم كشف حساب سنوى عن جميع أعمال الرابطة

بأنتظار زيارتكم الكريمة

أسرة الرابطة

أحمد الصعيدي يقول...

رنا يخلصك من الكلية دي علي خير قبل ما تهيس دماغك

وربنايسعدك دايما

السلام عليكم

riham attya يقول...

لا حول ولا قوة إلا بالله

بجد صعبتى عليه


ايه الناس دى قلبها حجر


واااااااااااااااااااااء

واااااااااااااااااااااااء


إليك رسالة خاصة لك


وحشتنى لمسة ايديكى


المرسل:


((ورقة الامتحان ))