الاثنين، 30 نوفمبر 2009

مهاترات ووداع


الزمان : 1/12/2009 قبل إمتحان ميد تيرم الكوجنوزى بإسبوع

المكان : أكيد فى بيتنا ... أمام مرايتى الأيديال زانوسى المستوردة من بلاد معرفهاش من أحدى ممالك الجوكنوزى المتحدة فى روايات ألف خيبة وخيبة !!!

المهمة : عايزة أذاكر



العمل : عمل ربنا !



* بلغنى أيها الملك السعيد ...والصيدلى العتيد .. أنه فى يوم بعيد ..حيث المبنى الجديد ..فى الدور الثالث المجيد ..أعلنوا عن إمتحان ميد تيرم شديد .. بقيادة المظفر طويل العمر يطول عمره أمير مملكة الكوجنوزى المتحدة الحكيم الرشيد !!

*** أهىء أهىء أهىء قوليلى يا مرايتى .. قوليلى أية جنايتى .. تكونش أية جريمتى ؟؟؟ لية أنا كدة ؟؟ مش لاقية حد يفهمنى ؟؟؟ لية بيعملوا فيا كدة ؟؟ انا خلاص تعبت من المفأجأة ونزلت دمعتى !

** قوليلى يا مرايتى لية أختى سوكا من ساعة ما دخلت صيدلة بتقولى أن ودانى كبرت يا مرايتى ؟؟؟


العفو يا مولاتى ... دة بس من كتر ما بتسمعى أخبار سارة فيها يا مولاتى

*** طيب لية بيقولوا كلام غريب على مرارتى يا مرايتى ؟

قطع لسانهم يا مولاتى .. دى قلة منحرفة .. دى بس مرارتك مفقوعة ومنفوخة من كتر ما بتحضرى محاضرات يا مولاتى

طيب قوليلى ...... تقاطعنى المراية


حرام عليكى . انت شكلك فاضية ومعندكيش مذاكرة يا مولاتى . خصيمك النبى تخلى أختك سوكا تلعب أدامى بالكورة وتكسرنى وتريحينى بقا


شكلك مش ناوية تجبيها لبر يا مرايتى . انا حسيبلك الدنيا كلها وأروح أذاكر على البحر حيث الهواء الطلق والراحة النفسية يللا بسم الله german chamomile التعريف ..mat..mat..matricaria ..أيية؟ ماتريكاريا ؟؟؟؟ من أولها كدا ماتريكاريا ؟

يعنى أية مات ويعنى أية كاريا ؟؟؟ يعنى الله يرحمه مات وهو عنده كاريا يعنى ؟ عموما يا بختة

وهنا وقفت أبكى ألأنشودة القومية " أنا مها ذاكرت مدبلر .. أنا مهما عملت هشيل ..مش ممكن يوم حتغير ..ولا ممكن أجيب تقدير "

كدا بقا مفيش حل غير انى أعمل جدول عشان أعرف أذاكر وألحق نفسى وهيبقى قبل الأمتحان 4 أيام الجدول كالتالى فى حيز التنفيذ:

4/12

تعبان

5/12

عيان

6/12

ورمان

7/12

إمتحان

إلى هنا تنتهى مهاترات ما قبل الأمتحان وكفاية كدا وأقوم أذاكر لحسن بقى شكلى وحش فى الأوساط

وأقولكم انى أخدت قرار مصيرى فى حياتى وهو إنى هفصل النت عندى الشهردا وممنوع الأقتراب أو التصوير حول ما يعرف بالشبكة العنكبوتية أو الأنترنت .أو حتى ملامسة جهاز الحاسب الألى .ودا لأن ماسورة إمتحانات هتتفتح قريب ولمدة شهر قابل للزيادة والله أعلم هنخلص أمتة العلم عند الله وحده وواضح أن الدكاترة عملينها مفاجأة.دعواتكم بالله عليكم فى أمس الحاجة إليها وأهم دعوة أنى مدخلش فى الشفوى للدكتور منير ...

اخر حاجة فأنا سيبالكم جميعا هدية وهى قصة حتى لاتموت الروح القصة دى بجد تحفة أنا عملت مدونة عشان أعرف أنزل فيها الحلقات لأنها طويلة .والحلقة الأولى والمقدمة دلوقتى نازلين عليها .وإن شاء الله هتنزل حلقة أو حلقتين أسبوعيا بس عايزة حد يتطوع ويأخد القصة وينزلهم عشان المقاطعة إلى انا هعملها مع النت بس متقلقوش جارى البحث عن شخص. ويارب تعجبكوا .



أستودعكم الله الذى لاتضيع ودائعه


أشوفكم على خير بعد الأمتحانات لو لسة على قيد الحياة



هناك 13 تعليقًا:

أحمد الصعيدي يقول...

أعانك الله ووفقك لما يحب ويرضي

اللهم لا سهل الاما جعلته سهلا وأنت تجعل الصعب اذا شئت سهلا


اكثري من الدعاء القادم

اللهم الطف بنا في تيسير كل عسير فإن تيسير العسير علي يديك يسير

مجرب

وفقك الله أخت الاسلام

السلام عليكم ورحمة الله

Arsenal Way يقول...

ربنا يوفقك يا دكتوره و ييسر امورك و يكتب لك النجاح

صوت من مصر يقول...

بالتوفيق

بنت الأسلام يقول...

إلى غير معروف

كان فى تعليق كتبه هنا حد بأسم غير معروف وكان كاتب فى كلام أنا مش عارفة أوصفة ..وانا مش بكتب التعليق دا عشان ارد علية .عشان هو أقل من إن حد يرد علية .بس انا مش بحب أمسح تعليق حد كتب هنا فى مدونتى بس أنا أضطرت أحذف التعليق دا وعملت إشراف على التعليقات .

زهرة(جنى)الاسلام يقول...

السلام عليكم
اللة يكون معاكى فى امتحاناتك واحنا معاكى بقلوبنا
انشاء اللة امتياز مع المرتبة ممكن تبقى تسبيها انام عليها شوية

كريم مصطفي سيد يقول...

السلام عليكم
ان انشاء الله بالنجاح يادكتورة ويبعد عنك منير وييسرلك الحال وبخصوص القصة انا دخلت عليها وماشاء الله جميلة جداااا ولو عايزة تبعتهالي ابعتهالي انزلهم علشان الامتحانات في رعاية الله بالتوفيق

قلم رصاص يقول...


السلام عليكم


كل سنة وانتي طيبة يادكتورة

والله تعالى أسأل التوفيق لكم في الامتحانات وربنا يبعد عنك الدكتور منير
.. مين منير ده ههههههههههه

عجبتني جدا الجمله دي "وهنا وقفت أبكى ألأنشودة القومية " أنا مها ذاكرت مدبلر .. أنا مهما عملت هشيل ..مش ممكن يوم حتغير ..ولا ممكن أجيب تقدير "
"

بجد تموت من الضحك

بس ان شاء الله ربنا هيكرمك

وكويس جدا انك عملتي اشراف على التلعيقات عشان فعلا فيه حشرات ضاله اليومين دول منتشره على بلوجر

ربنا يرحمنا منهم

دمتي في امان الله

جمعاوى يقول...

أعانكم الله و سدد خطاكم

ابو صهيب ( الجمعاوي الاصيل)سابقاً يقول...

يلا على بركة الله

وربنا يعدهالك على خير ان شاء الله

وعموماً عمر الشقي بقي

وربنا يتولاكي برحمته

وبالتوفيق ان شاء الله

خالك ابوصهيب

دكـــــتور جدا يقول...

ربنا معاكي يادكتورة

الله المستعان

المسلم الصغير يقول...

السلام عليكم ورحمة الله وبركاته...
ربنا معاكي ويا رب تجيبي تقديركويس
دومتي بخير

بنت الأسلام يقول...

جزاكم الله خيرا جميعا

محمد أبووردة يقول...

ربنا معاكي ومعانا احنا كمان يا دكتورة
انا عارف انا تهييس الامتحانات ده
يا خبر ابيض عليه
عموما ربنا يستر
في الامتحانات الجاية
وبالتوفيق ان شاء الله
اخوكي
نور الدرب
صاحب مدونة
قلم حر
www.freeqalaam.blogspot.com
زيارتكم تشرفني وتعليقكم يسرني